Kisa ?
Kisa tonnè ? Kiyès ou ye ?
Ayibobo ayibobo !!
Nanm mwen soti lwen, n ap flannen tout kote
Chen vire chen desann chen ale
chen paka jwenn sous Pou l bwè dlo.
Ay! Fout manman mwen !! Kote nou rive la ?
Sa k santi konsa ?
Ban m ri nou !! Nou santi chawony !!
Gade figi nou gade nanm nou.
Bèt pi byen pase nou.
Lire aussi>> Fanm Kreyòl epi pwen
Ayibobo ayibobo !!! Manchèt se tchaw Tchaw
L ap fè sou zo kolòn do nou,
N ap vibre anba soufrans, tèt nou pati.
Nou bliye kiyès nou ye. Kisa n ap fè ? Anyen
Kote n prale ? Ankenn kote, nou pa deplase !
San vide, zonbi leve,
Lougawou ap vole y ap mande vyann,
Y ap chèche vyann.
Ogou-ô ! Nèg gè!
Kanon tire, fizi tire
Nou pa pè la gè
Ogou-ô ! Nèg gè !
N ap lite, n ap goumen pou anyen.
Koulèv la pase, l ap danse, li vire, li pantan !
Monte sou tèt krèk madanm blan
Mande l kisa l pote ?
Nou pa konnen,
N ap kantonnen, n ap paweze. N ap ri
Lanmò devan, lanmò dèyè,
Epi n ap tonbe tankou sak.
Sak pi di a, nou pa t janm konn viv
Lire aussi>> Se pa pou Dat #1
Ble ? Blemi
Jòn ? Kanni
Wouj ? Wouji
Bwa ? Nwasi
Blan ? Peri.
Siyonnen sou tèt mòn nan, na va jwenn Jistis.
Yo rache je n, kraze lanng nou,
Mare bouch nou,
Fè n pi mal pase chwal, epi n ap danse….
Nap rele anmwey doulè sa twòp pou nou.
Nou rele Lwa nou rele Lwa nan Govi
Yasou n pèdi, monte desann nan Zile,
Se siye bouch nou atè nou pa wè li.
Se krache n ap krache
Se fyèl nou n ap rann
Se tèt nou ki prale.
Se kè nou k ap pouri
Se kò nou k ap tounen zonbi
Se bidip bidip bidip !!
Kanson nou kraze.
Chwal yo ale, n ap peri nan silans
Paske yon jou nou te pèmèt !
Neïssah.D. Placide
Aïe fout, ou pale ak lwa nan tét mwen, text la pote peyi a ak jan nap viv sitiyasyon kriz san fen an nan tout kwen nan ków