Nanpwen lannwit ki kapab kanpe
Anfas koulè nanm ou
Ou se yon moso fènwè ki bay
Zetwal ki pèdi chimen syèl la
Yon rezon pou yo pa etenn
Chak mwen gad nan je w
Se tankou m te kwaze bab pou bab
Ak de siklòn ki vle m pliye mete jenou m atè
Pou m sa renmen sa ki nan ou pèsòn lòt pa wè
Yo etenn limyè w, men ou pa bezwen pè
Vin kouche nan bra m ak tenèb ou
Kite m chofe kè w ak dife pwent tete m
Lè w mete men w ak bouch ou sou po m
Mwen konn santi w ap tranble
Men cheri pito w kriye pou w sa mete deyò
Regrè, lapenn ak kòlè ou yo
M ap seche dlo nan je w
M ap panse plè ou yo
Si w vle n ap pale de sa ki fè w mal
Si w pa vle tou, n ap fè lanmou
Men silans ou p ap fè m sispann anvi
Renmen w epi konble sa ki vid nan ou
Cheri se nou de lavi kraze
Men si w vle nou kapab mache, chèche epi sanble
Moso kè n ak moso nanm nou pou n fè pil la fè yon sè l
Pou n sa renmen sa ki nan nou pèsòn lòt pa wè…
Li sa tou >> Plenn nan Kè