E si tout bagay kòmanse tonbe
Tankou veso ki mal chita nan panyen
Pou detache trip nou ak kote kòd lonbrit nou
Ap lalòz ak yon seri de rèv ki kache nan mitan vant
Krich n ap lonje pou n mande tikal lacharite
Lacharite kisa ? Kiyès ?
Lacharite fè m soufri depi lè li volè ekzistans mwen
Dlo je m nwaye nan soufrans nanm mwen ap sibi san pale
Pandan souflèt lamizè ap defigire m
Moun mwen ye an, moun mwen te ye an,
An miyèt moso
Ap tonbe kraze tankou se biblo sou bifèt
Gwo mak zong lèzòt chire lestomak mwen gwo midi
Kale l tou lanvè bay solèy
Yon solèy ki pa gen pitye pou kretyen vivan
Ki pa gen pitye pou rèl do m ki koube k ap chèche ti moso figi m
Ki dekapote, dechalbore, tankou se lè w mouri Lasalin
Sou tèt fatra anba djòl kochon
Mwen leve je m nan syèl lan
Je m tonbe sou montay yo, montay yo fè wonn mwen
M ap tann kote sekou m ap sòti
Sekou rive nan wout, li wè se mwen
Li tounen tankou se lèt bèf ki kwaze ak twòp van
Laperèz kouvri m, mwen poukò m
Lavi griyen dan sou mwen,
Lanmò pare pou l makonnen avè m
Figi lanmò se labou,
Se wòch ki monte grenn pa grenn nan mitan ravin yo
Lanmò se zòt ki pete figi m
Ki kraze l anba talon pye l
Lanmò se zam k ap chante twopikana katrè di maten
Anba po m
Lanmò se lè lavi m depann de bal mawon.
M ap pèdi moun mwen ye an moso pa ti moso
Mwen leve je m mwen gade
Mwen se youn pami plizyè figi kraze
Tèt pete, rèv drive tankou se bouzen
Ki blayi afè l pou twotwa pile, banbile
M ap chèche doulè jouk kote l ye an
Pou m wè si l te ka fè m santi m moun
Doulè mèt chire m pak an pak
O mwen m ava kriye pou zanfan yo
Pou sila ki pèdi rèv yo
Sou fwontyè
Nan mitan ravin
Nan gran chimen
Nan kafou rezistans
Nan tete manman yo
M ava kriye pou kadav ki fin tounen paswa
Nan riyèl Mati nimewo San
Pou kilòt sè nou yo k ap desann ak vyolans
Pou wout nou yo ki pa konn kote pou mennen nou
M pa p rele, m ap kontante m de kriye
Lè w rele pa gen moun ki tande vwa w
Krich nou plen ak manti,ak salopri,
M pito kriye
Paske lè m kriye se lè sa m santi m ekziste.
Lire aussi>> Bri Mak Kò w
Eder Apollinaris S.
[…] Lire également>>Plenn nan Kè […]