Lanmou tenèb

Mwen renmen w, men pa espere m pral di w sa.

M ap fou pou ou, men m pa vle w nan vi m.

M ap kache santiman m, kache pa w

Mwen pa bezwen nonm, souple, pa mande m fanm

Pa rakonte m lavi w, pa m lan se yon gwo lizyè mistè

M pa bezwen konnen ki koulè nanm ou ni ki rèv ki ka fè dlo kò w benyen kò w

M pa bezwen konnen kòman w leve, souple pa vin mande m si m te manje

Limyè detwi tout bagay,

Ann viv nan tenèb la nou menm, ann mouri epi resisite nan yon toubiyon fènwa

Sa k ka fè chak branch cheve nan tèt nou kanpe yo, nou pa oblije pataje yo

Sa k ka fè chak gout san nan kò n tounen dlo yo, ann kite sèlman kouto nan kè yanm nou konnen yo

Kite n kontinye pi fou chak jou

Se pa nan ti sa a nou t ap al rejwenn tèt nou ki pati depi dikdantan

Istwa kote yo marye epi yo fè yon pakèt ti lèzanj yo pa enterese m ankò

M depase laj pou sa

M vle reve gratis

M vle reve ak tout libète m

M vle layite kò m nan plezi san kondisyon

Koup yo se kote ki gen plis ipokrizi

Ann pa konstwi yon chato k ap kraze tout jan tout jan

Pa vin di m ou renmen m, menm si se ta vre

Pa gade m nan je, m pa ta vle w dekouvri mistè ki kache nan nanm mwen,

kite m nwaye verite m nan de twa gout dlo je

Fènwa yo t ap byen renmen pataje chalè kò nou

Alòs,kite zetwal nan syèl griyen dan sou foli nou.