Pergolayiti
Take a fresh look at your lifestyle.

Endiyasyon

1 760

Mwen leve ak rèv rèl krèv kè kèk frè

k ap fè klewonnen endiyasyon yo

Nan mitan yon sosyete soud

Bèkèkè   

Nan lespri

Avèg

San bon sans rans vagabon

Sansal k ap fè dapiyanp

Sou lespwa

Yon ti pèp ki pa menm posede yon

« Aki m prale »

 

Dechèpiye lespwa sou tab mache anfè

Kat pye kwochi k ap tranble

Souri manman ak tèt Mare ki sa konnen

Pitit li chita devan yon Tablo nwa ap aprann

Rèv blan lavi a

Tab k ap kadanse

Danse dans kole sere

Ak grenn wòch ki pou sa soutni li

Kote vyann santi kochon

Grate nan bonm pwa

Sete yon kaye sou ban ledikasyon

 

Kote trip bèf makonnen

Vant k ap tòde anba grangou

Sete lespwa fanmi an

Sa va gon ti jeni ka va fè

Ti trip sispann dechèpiye gwo trip

Epoutan

Ti Mari monte , li pa desann

Ti Sonson soti , li pa antre

 

Yon rèv delivrans

Flanm dife pòv

K ap makonnen pòv mennen ale

Ak tout lespwa ti machann

 

Vòlè espwa manman tèt mare

Fè l sa desann kòd ki nan kou li a nan vant li

Fè li kriye :

« mare vant mwen,

m paka sipòte ankò »

Yo ava kriye rele

Ak dlo anmè sèvo anboulatchwa

Ki sa va anbeli

Souri kontantman

Bò djòl bokè sila

Ki sa satisfè de zak malveyans li

 

Ki kontantman ki gen nan sa?

Nou chyen

Nou pa vo anyen pou yo

Yo fèk kare ap pandje palanke plen pip nou

Kou bouzen bò lari

Ak kèk lespwa wout ak pwomès manje

Ak kèk bèl diskou

Kote se sèlman mouche a vès yo

Ki konn fomil la

 

Vi nou tris

 

Vi nou mal

 

Kou fanm ki ap lite ak grangou

Se akoupi m senyen w

 

Se pandje m pete kannkès ou

 

Se pase li yon bò pou m tenyen dife w

 

Epi se

« jann nangèt vip bip kalebouyi »

Bon

M al bwè on ti gwòg

Pou m neye sitiyasyon an tankou nou tout

 

M oblije ap ri sa ki ta dwe fè m kriye…

Envoyez-nous vos textes, faîtes partie de l'aventure Pergolayiti

1 commentaire
  1. Mervil john Gerald Stanley dit

    Ou di tout sa pou nou ta di.

Laisser un commentaire

Votre adresse email ne sera pas publiée.